’t Is nog mà slechts een paar joaren leene det 2 vaste klantn van De Schoenmaker, Geert van Brakel en Harry Velderman, oons vèrloatn hebt en wie weet, in de Hemel beland bint. Ik kreege doar destieds een ‘visioen’ bie det ik op onderstoande wieze vèrwoard hebbe. ’t Is zo mà ’n gesprek aans wíét vot ….;
Geert:
“Zo Harry, bin ie d’r ok ?”
Harry:
“Uh .. wàblief Schipper. Wà zeggie ?”
Geert:
“Dej d’r ok bint, en dan ok à zo rap noa mie”
Harry:
“Ach Schipper, beneedn was d’r nie velle meer àn. Jantie beveurbeeld hef de tente de mondagoamde dichte gooit”
Geert:
“Tja, dan kan ik begriepm dej ’t wè zeene hàn doar”
Harry:
“Mà ’t veurdeel was wè de’k zo mooi van det Krukkertvolk of waare.
Theo met die starke vèhaaln van vrogger. En dan haj ok nog den Droadnagel, den van de Keephouwer en nog ’n halfwasn”.
Geert:
“Voj det nie gezellug dan ?”
Harry:
“Wat !! Gezellug?!
’n Ramp was’t Schipper, ie waan d’r toch zelf ok bie ?
Gezellug zegge. Met det gedonder met die baln op toafel. Fatsoenlukke proat hàn ze nie, alleent mà ’n bonke lawaai”
Geert:
“Joa lawaai hàn ze vaake wè, met hun muziek”
Harry:
“En dan det domme gelul van hun. Vèrstaand had d’r ginne.
Oltied mà weer vroagn noar de bekende weg met die ‘leuperties’ …
… en toch Schipper … ‘Veni Jesu Amore Mi’ zal ik wè goan misn. Of zol Petrus hier det nog op de bandrecorder hem stoan ?”
Geert:
“Det mut wie hum zo metíéne mà ēēm vroagn. Gunds kumpe àn”
Harry:
“Proost Schipper … en èh, loat wie d’r saam mà is íéne opstekn … ”
Geert:
“Saam ? Of ieders íéne ?
Harry:
“Och Schipper, ie begriept toch wè wa’k bedoele ?”
“Dag Petrus, ik binne Harry van de Wörmink. Aangenaam. Kuj is ’n bettie muziek veur oons drejn ? Ik heb nog ’n vèzoeknummer.”
_____________________________
___________________________
Noe, net veur de Kàsdaagn, hef zich een nieje stamgast van De Schoenmaker, Bas van den Toren, bie Geert en Harry àn de Hemelbar e-voegd. En det lēēvern ’t volgde gesprek op:
Geert:
“Zeg Harry, muj noe is kiekn wa’k zegge.”
Harry:
“Wàblief Schipper, kiekn waj zegt ?”
Geert:
“Ik bedoele, kiek is wie doar binkump !”
Harry (vèrbaast): “Welverdomd, ’t is Bas !! Nou, ie bint ok nie vèrlaat kjeal. Bi-j soms met ’t bussie köm ?”
Bas:
“Det bussie kump mie de strotte uut. Net zo as wè meer dinge.”
Geert:
“Hoe det zo ? Hef Jantie soms de tente noe heemoa dichte doane ?”
Bas:
“Nee, det nie. Mà ik kwaame d’r de laatste tied nie meer. Ik had d’r gin zin meer àn.”
Harry (licht grijnzend):
“Àn die gehaktbaln van Jantie bedoel ie ?”
Bas (lichteluk geïrriteerd):
“Nee, àn die leuperties, noe goed !”
Harry (nog meer geïrriteerd):
“Begin ie noe ok à oaver die leuperties, ie bint vèrdomme toch gin Krukkert ?”
Bas:
“Hoezo det dan, heb ie dan ok à zo de pest àn hun ?”
Geert (veurzichtig):
“Nou Harry had oltied …”
Harry (Geert in de rede vallend):
“De pest ! De pest, zeg ie ?!
Ik hebbe nog nooit zuk vèrvéélnd volk met e-maakt. Ik hoppe det ze nog lange, heel lange vot blíéft.”
Geert:
“Harry had oltied ..”
Harry (Geert opniej in de rede vallend):
“Och Schipper, hoal d’r oaver op. Ik wul d’r niks meer oaver heurn. Ik binne blíé det ze hier gin biljarttoafel hebt.”
Bas:
“Nou, ik heb met Höllenboer ok wè is teegn de Krukkerts biljart … wat een lulzakn waan det zeg, met bèveurbeeld hun gedram oaver de V1 en V2.”
Geert:
“Harry had oltied …”
Harry (Geert noe op harde toon in de rede vallend):
“Joa vèrdomme, noe is’t wè kloar. Petrus. Zeg Petrus, doe oons is ēēm wat te drinkn in. Bas, wat wul ie hem ?”
Bas:
“Een Kriek natuurluk.”
Geert (glimlachend):
“Ha ha, better een Kriek dan ‘der Krieg’ zo as doar beneedn ?”
Harry:
“Volgens mie hej ok nog íén of aandere componist die Kriek heetn”
Bas:
“Nee, den heetn Grieg. Edvard Grieg. En nee, um uulle domme grapm veur te wēēn, det was gin Griek.”
Harry:
“Eerluk is eerluk, die Krukkerts hàn wè wat met muziek. Zeg Bas, det ‘Veni Jesu Amore Mi’, is det toevallig van den Eduard Kriek ?”
Bas (corrigerend):
“Edvard Grieg Harry. Edvard Grieg.”
Harry:
“Och, wat maakt det toch uut, ie weet toch wie’k bedoele ?”
Bas:
“Ie bint toch Harry en gin Harold ?”
Geert (gekscherend noar Harry):
“En ik heete Geert en gin Schipper.”
Harry (geprikkeld):
“Och, det weet ik toch oammoa wè. ’t Maakt mie eigeluk feiteluk ok niks uut woar det ‘Veni Jesu Amore Mi’ noe van is.”
(Petrus hef ondertusn ’t Kriek-biertie en 2 börrelties neerzet)
Harry:
“Loat wie eerst mà is proostn. En hier van de rust genietn … zo lange ’t duurt. Petrus. Zeg Petrus, kun ie de bandrecorder nog is weer ànslingern met ‘Veni Jesu Amore Mi’ ?”
Harry, Geert en Bas:
“Proost!”
Bas:
“Hef iemand nog wat te rookn ?”
Harry:
“Hier Bas, kheb nog wè een kloarn. Loat wie d’r inderdoad saam mà is íéne opstekn … ”
Geert:
“Saam ? Of ieders íéne ?
Harry:
“Schipper, Schipper, Schipper, ie begriept toch wè wa’k bedoele ?”
(Ondertusn hef Petrus de bandrecorder start)
Bas:
“Petrus, hej hier ok nog een piano stoan ? Dan wul ik is ēēm prèbeern en kiekn of ik nog wat akkoardn met kan speln.”
Video Veni Jesus Amore Mi
Meer herinneringen aan Bas klik hier
