Noa 18 joar Leonid Brezjnev nam Youri Andropov in 1982 ’t stökkie van ’t leiderschap van de Sovjet Unie oaver. Hij heul ’t echter nog gin 1½ joar vol en toen kwaamp Konstatin Tsjernenko die ’t op zien beurte mà net iets meer as 1 joar volheuld. Mà hee, det was mooi wè net lange genog um een prominente rol op te eis’n in een videoclip van de Britse band Frankie Goes to Hollywood.
(Lees verder onder afbeelding)
Disse vēēnte uut Liverpool bracht’n in 1984, tijdens de regeerperiode van Tsjernenko dus, de single ‘Two tribes’ uut. Een aandere prominente rol in de videoclip is veur Ronald Reagan weg-e-legd. Hij was van 1981 tot 1989 de president van de V.S.
‘Two tribes’ gíét oaver de Koale Oarlog die oaverigens mede deur toedoen van Tsjernenko’s opvolger, Michail Gorbatsjov, töt een einde kwaam. Althans … veurlopig. Want kiek is woar as de wēreld noe stíét.
Een wēreldwiede oarlogsdreiging lik grooter dan ooit met oarlogstaal uutsloande en mekaare provocerende machthebbers die kloarbliekeluk de dynamiek doarvan onderschat. Sie liekt de meugelukke gevolg’n van hun optredens veur de gewone man gees nie te beseff’n.
’t Is as of ze denkt met een computerspellegie, een veer-van-mien-berre-show bezig te wēēn. En det is juust wellicht ok ’t punt. De hooggeplaatst’n hebt bie een warkelukke oarlog nāās las van. ’t Bint de gewone luu, iej en ik en oonse wichter die olle ellende oaver zich hèn kríégt. Mà det deert ‘oonse’ politieke leiders nie.
Hoe mooi zol ’t deurumme wēēn as det noe is net precies āānsumme zol kunn’n wēēn? Det de gewone burger gewoon zien eig’n lēēm kon blíém leid’n. En det de ànjagers van oarlog mekaare letterluk, net as in de videoclip uut-e-beeld wut, bie de ball’n griept. Of nog arger, det juust hun lēēm beheerst wut deur een en ol wanhoop, vèrlies, destructie en angst. Want wat de boam oons gesteld’n oons keer op keer duudeluk maakt is hun pure minachting veur ’t lēēm van aander’n.
Ie maagt toch hopm en bidd’n det ’t gezonde vèstaand snel de oaverhaand krig. Want hoe mut ’t āāns goed komm’n ?
Ghandi zei is: “An eye for an eye makes the whole world blind”. En doar ik voege mà àn toe: “De wēreld gíét nie ten onder àn klimaatvèraandering mà àn de oarlogszucht van idioot’n” (woarbie vremd genog hun angstvèrhaal van tevelle CO2-uutstoot d’r dan iníéns nie meer toe dut).
Okee, veurdet wie noar de videoclip goat eers nog wat vèrhelderende uutleg oaver de tekst van ‘Two tribes’:
- Met ‘black gas’ wut de öllie en öllieprodukt’n as benzine bedoeld.
- ‘Cowboy number one’ vèrwis noar de Westernfilms woarin Reagan e-speld hef. Hij speld’n ok in de film (zien debuut) ‘Love is on the air’ wat ok in de liedtekst terug te heur’n is.
- De regel ‘A born-again poor man’s son’ vèrwis noar de armoede in Reagan’s jeugd woarin zien Vá een nie zo succesvolle schóénvèkooper was.
- ‘I modeled shirts by Van Heusen’ gíét oaver een kledingmark woarveur een nog jonge Reagan reklame maakt’n.
Goed. Dan is’t noe de hoogste tied um de videoclip is goan te bekiek’n. Doarin spelt natuurluk nie de echte Ronald Reagan en Konstatin Tsjernenko met mà look-a-likes die een flinke strijd lēēvert die nie goed eindigt.
(Lees verder onder afbeelding)
En behalm det de videoclip lakker stereotypisch en satirisch is, isse noa 40 joar opniej ok weer vèrbijsternd actueel.
Videoclip
