Op 10 juni 1941 vun d’r in Assen iets biezönders plaats, nameluk de geboarte van de beste blueszanger van Nederlaand. In 1962 richtn disse kjeal, Harry Muskee, saam met Eelco Gelling de band Cuby & the Blizzards op.
Harry zien jeugd was nie makkeluk, met een Vá die krijgsgevangene in Duutslaand was en die hij veur ’t eerst zag toen hij 4 joar was. Harry’s Móé leed àn Multiple Sclerose en stierf toen hij 20 joar was. Een joar laater stierf zien oma die h’m velle vèrzörgd had umdet zien Móé det nie kon.
Eigenluk kuj dus wè zegn det Harry de blues àn den lijve ondervun hef. Hij leern echter pas op 15-joarige lēēftied gitaar speln. Met de blues kwaam hij in ànraaking via een radiostation vanuut Duutslaand en toen hij een LP van John Lee Hooker in haane kreeg was hij definitief àn disse lēēmsmuziek vèrslingert.
Oaver Harry en zien Cuby & the Blizzards valt nog velle meer te vèrteln. Aj d’r een echte liefhebber van bint kan ik oe ànrôan is ’t museum in Grolloo te bezuukn um oe doar te vèrlíézn in de geschiedenis van disse kjeal en zien band.
In disse rubriek lēēver ik vèdaage 2 nummers àn, een dubbelportret dus, gewoon umdet de man ’t vèrdíént.
Ollereerst de klassieker ‘Window of my eyes’. Een líédtie uut 1968 den 10 wekn in de Top40 steun met as hoogste notering nun 10de plaase:
Kijk hier naar de video
En as kàrs op de taarte volgt hier ‘Somebody will know someday’ woarvan ik vinne det ’t mèschien wè de beste plaate ooit van Nederlaandse boadem is.
‘Somebody will know someday’ is uut 1967. De pianist diej heurt zol laater ok heel beroemd wun, det is nameluk Herman Brood.
Kiek en luuster en loat de ultieme Drentse blues op oe gemóéd inwarkn. ’t Hef net as de hunnebedn eeuwigheidswaarde en is ok nog is stíéngóéd:
Kijk hier naar de video
