Weej nog, de euforie in 1989, toen ut iezeren Gordien lös skēūf en de Berlijnse Muure daale gung ? Iederíéne was in extase.
D’r hung wereldwied een onbeskríévelukke sfeer in de luch; weg met de Koale Oarlog, weg met ut wantrouwn, weg met de haat en nijd. Vrieheid !!
’t Was net as of de ‘Flower Power tied’ opniej neerdaalt was, mà dan noe dit keer in de àngrenznde laane van de toen zo beruchte scheidingslijn tusn Oost en West. Ut was een gevuul van een eeuwig durende lente.
En kiek noe ! Noa 34 joar binne wie terugge bie of. Starker nog, de ellende is nog velle moaln grooter dan in veur 1989, met een bloedige oarlog in Oost Europa, met (dreigende) energie- voedsel- en watertekortn, woningnood, armoede etc. Ut is domweg íéne groote puinbende.
Politici van destieds, zo as Michaël Gorbatjov, Miklós Németh en Lech Walęsa waan betrouwbaar en steun stark veur hun volk.
Hedentendaage kríége ik de indruk det de meeste politici d’r veurol veur hunzelf zit, hun ofspraakn en beloftes absoluut nie noakomt en vaake à bezig met hun toekomstige baantie elders te waarborgn.
Hoewel e-kēūzn deur ut volk, vèrteegnwoardigd ze detzelfde volk nie en de politieke wul um de probleem op te losn lik nie ànwezig. De vèrantwoardelukn duukt schandalig weg veur ut debat (zo as van de wekke Rutte nog bie een debat oaver de Toeslagenaffaire).
Mà wie kríégt binkot de kaans um wat te vèraandern. Op 15 meert kuj gôan stem. Iets, zo vinne ik, wat aj oltied mut dóén as’t zo veer is want wie zwijgt stemt in met de huidige situatie.
En ut is mèschien nie àn mie um een stemadvies uut te brengn. Mà toch … gezien ut totale falen de laatste 10, 12 joar op heel heel velle terreinen zo as bijv. ‘Groningen’ en de eerder genuumde Toeslagenaffaire en uut de weg gôan van ut debat deur de vèrantwoardelukn, denk ik det aandere partiejn noe mà is de kaans mut kríégn.
Aandere partiejn die, via de 1ste Kamer (want doar hebbe wie ut oaver), de huidige coalitie en hun gedoogpartners doar woar neudig, terugge kunt fluitn.
Goa stem en WĒĒS de vèraandering want ie BINT nameluk de vèraandering !!
Mà wè alleent dàn, aj oe loat heurn zo as ut volk det eind joaren ’80 ok dee.
Dus stem en loat in oons laand, met ut veurjoar op komst, de mēēnselukke warmte teruggekeern en ut gevuul van een eeuwigdurende lente opniej deur de luch zweem.
Klik hier voor de video
