De zanger William Paul Dorsey zal de meeste luu nie velle zegn mà zien artiestnnaame Willy DeVille vaste wè. 25 Augustus 1950 is zien geboartedag en joa, ok hij is zo as zovelle artiestn vels te jong e-störvn. Willy Deville stierf op 6 augustus 2009 àn alvleesklierkanker, 58 joar’n jong.
Hij wönn’n bekend as leadzanger van de band Mink DeDeville met as grootste hit Spanish Stroll. Solo had hij o.a. een grote hit met Storybook Love. En van het nummer Hey Joe van The Leaves uut Los Angeles, veurol bekend e-wönn’n deur Jimi Hendrix, hef Willy DeVille een wè heel àpatte mà ok mooie versie maakt (incl. videoclip) diej hier kunt vin.
De man was 20 joar lange àn heroïne vèrslaafd wat h’m nie in de koale kleern is goan zitn en wat hum destieds dan ok duudeluk was àn te zíén.
Zien muziek is lastig te vang’n onder 1 nuumer. ’t Is vèlal een mix van country, rhythum & blues, soul en Latin Music en met absoluut een zeer uniek stemgeluud.
De optredens van Willy DeVille valt ’t beste saam te vatn in de woardn; theatraal, deurleefd, romantisch, eigenzinnig en puur. Mà ok in; strak in ’t pak en met oltied, mà dan ok ech oltied en eeuwig, een sigarette tusn de vingers of lipm.
Dit joar is d’r een film oaver zien lēēm uut-e-köm e-titeld “Heaven stood still: the incarnations of Willy Deville” woarvan ie hier een trailer kunt zíén deur op onderstoande link te klikn:
Het eerste deel van genuumde filmtitel vèrwes noar 1 van de mooiste liefdesballads die d’r maakt bint; ‘Heaven stood still’ uut 1979.
Doarin zingt Willy DeVille oaver de perfecte nacht met zien geliefde. ’t Is een aantal moal e-coverd, ok deur Nederlanders zo as Piet Veerman, Benny Neyman en Jan Rot.
Het optreden dej goat zien is simpelweg groots in zien eenvoud. Het is een optreden van een uniek artiest die meer waardering verdíén dan det hij bie lēēm kreeng hef.
