Bie de naame Billy Preston denk ie woarschijnluk nie metíéne àn mega wereldhits. Toch hef hij een aantal heel grote succesn boekt die, aj ze heurt, vast direkt herkent zo as de duett’n met Syreetha Wright met It will come in time en With you I’m born again.
Mà ok solo boer’n Billy Preston goed met Will it go round in circles, in 1973 nummer 1 in de Billboard Hot 100 en in 1974 idem dito met Nothing from nothing. En veur ’t instrumentale Outta Space kreeg hij zelf een Grammy.
‘t Nummer You are so beautiful van Joe Cocker kömp ok van zíén haand.
Op 3 joarige leeftied begint Billy Preston à met örgel en piano speln. Det de man laater töt grootse dinge in stoat was blik nie alleent uut eerder e-nuumd succes mà ok uut de saamwarking en dus de waardering van nie de minstn uut de muziekwereld. As toetsenist hef hij biedraagn àn líédties van The Stones, Bob Dylan, Barbara Streisand, de Red Hot Chilli Peppers, Eric Clapton, J.J. Cale en Aretha Franklin um d’r mà is wat te nuum.
De bienaame van Billy Preston was ‘De 5de Beatle’ en det was natuurluk nie veur niks. George Harrison had hum vroagt met te warkn àn ’t album Let It Be en deur zien positieve goedlachse invloed was d’r zelfs sprake van det hij toe zol treedn töt de band die, eind joar’n ’60, strak steun van de spanning’n.
Hij nam deel àn ’t beroemde, spontane, Beatles-concert in januari 1969 op het dak van het Apple-kantoar in Londen. In september det joar kwaam’n The Beatles sinds det dakconcert veur ’t eerst weer bie mekaare en noar laater bleek, ok veur de laatste keer en van een lidmaatschap van Billy Preston van de band is ’t nie meer e-köm.
Mà hij is we de íénige artiest ooit die, nēūst de naam’n van de bandleedn zelf (meestà die van Lennon en van McCartney), met zien naame op een Beatles-single vèrmeldt stíét, nameluk op Get Back met as B-kaante Don’t let me down.
Zo as vaake bie velle beroemdheedn kent succes een keerzijde. Billy Preston stak zien eign huus in braand en wönn’n doarbie vèroardeeld veur vèrzekeringsfraude.
Laater wönn’n hij ok vèroardeeld wegens gebruuk van cocaïne én wegens geweldpleging teegn een prostitué die een vent bleek te ween. Iets wat ironisch genog ok min of meer in een tekstregel in Get Back, (woaràn hij dus zelf met-e-warkt hef) veurkömp: “Sweet Loretta Martin, thought she was a woman, but she was another man.”
Uuteindeluk nam deur joar’nlange drank en drugs Billy Preston zien gezondheid steeds wieder of. Zo mosse de laatste 4 joar van zien lēēm 3 moal in de wekke àn de nierdialyse. Zien dood is gewoonweg tragisch te nuum. Een ontstökn hàtzakkie leid’n töt een coma van ruum een half joar öm d’r uuteindeluk nie meer uut te ontwaakn. Billy Preston, van 2 september 1946, oaverleed op 59 joarige lēēftied, op 6 juni 2006.
Ondanks olle tragiek was Billy Preston een vrolukk’n kjeal. Een líédtie woarin det oaverduudeluk noar veurtn kömp is zien nummer 1 hit uut 1973. Aj wat minder goed te passe bint muj doar ech ēēm noar luustern én kiekn (en aj góéd te passe bint ok). Ik weet zeekes det zien ànstekkelukke enthousiasme een positieve uutwarking op oe hef.
