Zöndag 9 oktober a.s. vind d’r in Lutnbarg een biezöndere karkdíéns plaats met as titel “Veur ut zingn de karke in.” Ut dak zal d’r hoogstwoarschijnluk nie of-e-bloazn wun en nee, ie hoeft nie Hervormd te wēēn of Katholiek, ut dreijt gewoon een uur lange um muziek.
Met nummers die in de 2022-edtite van DE Top700 steun wut de bie-eenkomst een ware muzikale happening. Met líénties die een mooie betekenis hebt umdet ze oe àn een biezönder moment doet denkn of umdet ze oe gewoon blie maakt.
Mà ok met líénties live e-zöngn deur Palet of met warkeluk prachtige Lutnbargse videobeeldn van oons dörp, van oons buutngebied en van gewone Lutnbargse luu !!
Zo røp elk líéntie een bepaald gemóéd op en weet ik zeekes det noa ut slotlied (ut íénige nummer oaverigens det nie in de Top700 stíét) iederíéne met een fijn gevuul de karke uutgíét … mà dan wè pas nóá ut zingn !!
Dus kom zöndag 9 oktober noar de karke in Lutnbarg. De deurn bint vanof 10.00 uur lös, de díéns begint um 10.30 uur. En noa ofloop is d’r veur de liefhebbers nog een bakkie koffie met wat lakkers d’r bie.
Kiek hier de video
Klik onder de video, heemoa rechts nēūst de songtitel en naame van de artiest (Mijn Gebed – D.C. Lewis) op dit ‘v’ symbool en vervolgens op ‘…meer’ en dan verschíént ok de tekst van disse Nederlandstalige klassieker uut de popmuziek in beeld. Kuj den ok à vuste mooi metzingn.
