Van de Februaristaking zult velle luu wè is e-heurt hem mà wat heult den noe in ?
’t Was een staking die op 25 februari 1941 ’s mons begön met trambestuurders in Amsterdam, e-steunt deur de Communistische Partij Nederland (CPN). Rond ’t Middaguur deun de hele stad d’r à àn met en een dag laater, 26 februari, breidn de staking zich uut noar aandere plaatsn in Noard Hollaand en Utrech.
De staking was een protest teegn de Duutse bezetter en nun 1stn èn ienigen openlukke massale demonstratie in heel Europa teegn de Joodnvèrvolging. De ànleiding was det d’r d.m.v. razzia’s honderden Joodse kjeals in Amsterdam waan op e-pakt.
De Duutsers braakn de staking met meedogenloos ingriepm. Uuteindeluk veul d’r 9 doden. Voarts wun stakers, CPN-leden en Joodn op e-pakt. Leendert Schijveschuurder was doarvan de 1ste Jood in Nederlaand die fusilleerd wun.
Sinds 1946 wut de Februaristaking joarluks herdacht bie ’t beeld van De Dokwerker in de veurmalige Joodse buurt. De Dokwerker is ‘t symbool van de kleine man teegn de grote macht.
In 1983 brachtn The Hooters (Philadelphia, V.S. 1980 – heden) ‘All you zombies’ uut. ’t Is ’n lied met Biebelse vèrwíézingen woardeur sommige Christelukkke radiozenders ’t nie woln dreijn. Zelf zaagn The Hooters d’r ok nie nie zovelle in mà tijdens een live-optreden veur een radiostation was ‘t juust dit líédtie det ’t publiek graag heurn.
De oprichters van The Hooters, Rob Hyman en Eric Bazilian (die ok ’t met een ‘religieus’ tintje One of Us van Joan Osbourne e-skreem hef), hebt ‘All you zombies’ in 1 nach e-skreem. Sie zegt zelf nie te weetn woar ’t oaver gíét en det een ieder zien eign interpretatie d’r àn geem kan.
Velle luu zíét d’r echter de kracht van de gewone kleine man teegnoaver de grote macht in, net zo as de stakers det in 1941 deejn, want Mozes die ’t veur zien volk teegn de Farao opnemt:
- Mozes die de 10 Geboden (de lēēfregels destieds) kapot gooit op ’t Gouden Kalf, een geschenk van zien breur de Hogepriester Aäron, die det Kalf e-schönkn had um ’t Israëlische volk tevrēēne te hoaln,
- De gewone man in de stroate – de zombie dus – die zich lik te vèrstopm en de oproep noar h’m um zich te loatn zien.
- Noach die, in zien eentie àn zien ark bouwende, uut e-lachn wut
disse gebeurtenisn komt oammoa veurbie in ‘All you zombies’.
En ’t spelt zich (natuurluk) of in Israël, ’t land woar miljoenen Joodn hun toevlucht e-zöcht hebt, woaronder hun die de razzia’s in Amsterdam (en laater de concentratiekampm) oaverlēēft hebt.
Oardeel zelf of ie de kracht van de eenling, de kracht van de gewone man, ok herkent in dit líédtie en wie weet, put ie d’r zelf wè onvermoede krachtn uut.
Klik hier voor de video