Een Zombie stíét in ut volgende lied veur een ‘geweten- en hersenloze moardmachine’, aldus de skríéftster Dolores O’Riordon (*6-9-1971 – †15-1-2018).
‘Zombie’ gíét oaver een strijd, woarvan de oarsprong terug gíét töt zeeker begin veurige eeuw. Zo was d’r in 1916 een opstand woar toen de IRA (Irish Republican Army) uut voart kwaam.
Vanof halverwège de joaren ’60 besleut disse organisatie terroristische ànslaagn te gôan pleegn um hun idee krach bie te zetn.
Det idee was det Ierlaand en Noard Ierlaand onofhankeluk mos wun van Engelaand. De strijd wut ok we is uut-e-legd as een strijd tusn Katholiekn (Ierlaand) en Protestantn (Engelaand).
Één van de velle dieptepuntn is ongetwiefeld Bloody Sunday in 1972 woarbie 14 ongewapende burgers deur ut Britse leger dood wun.
Hoewel d’r in april 1998 een vredesakkoard e-tekent is, wun d’r doarnoa nog in detzelfde joar bie een bomànslag 29 luu dood. Pas in 2005 maaktn de IRA via een historische vèrkloaring definitief een einde àn de strijd.
Direkte ànleiding in disse decennia durende strijd um ut lied ‘Zombie’ te skríém waan veur O’Riordon de dood van de 3 joarige Johnathan Ball en de 12 joarige Tim Parry in 1993.
De 2 jochies kwaam deur een bomànslag um ut lèèm toen ze een bedank-kaartie ging koopm vanwège Moederdag.
De IRA zei steeds te vechtn veur ut volk en namens ut volk. O’Riordon was doar woest oaver en zei: “The IRA are not me. I’m not the IRA, The Cranberries are not the IRA. My family are not.
When it says in the song, ‘It’s not me, it’s not my family,’ that’s what I’m saying. It is not Ireland, it is some idiots living in the past.”
Vertaald noar ut heden klopt die redenatie nog steeds; het Oekraïense volk wul gin oarlog, ut Russische volk wul gin oarlog, ut Nederlandse en Europese volk wul gin oarlog en ut Amerikaanse volk wul gin oarlog. De oarlog in Oekraïne is een oarlog van regeringsleiders. En àn die regeringsleiders heb ik mà 1 bosschop:
“Meer en meer wapens lèvern brengt gin vrede. Goa met mekaare proatn. Vèdaage nog !!!”
Klik hier voor de video