Plaatnportret: Rudy van Supertramp

Luttenberger muziekkenner Leo van Krukkert heeft weer een prachtig nummer afgestoft: Rudy van Supertramp en legt een link met damfenomeen Jannes van der Wal. Met video met Sallandse ondertiteling.

Interessant? Deel het artikel

leo van k 231202 Jannes van der wal titel

Op 3 december 1982 wön hij wēreldkampioen damm’n; Jannes van der Wal (* Driesum, Fr. 12 nov. 1956). Jannes was een uutzonderluk man en zeekes gin ‘dartiene in een dozien kjeal’.

Nēūst wēreldkampioen was hij ok 4 moal Nederlaands kampioen, een keer jeugdkampioen én 4 moal sneldamkampioen. Hij was zowel Nationaal as Internationaal Grootmeester.

Mà Jannes was ok een éénling, een kjeal die nie oltied begreepm wön en ok iemand die zelf de wēreld oltied nie begreep. Zo vèrscheen hij op tullevisie een paar daagn noadet hij in Brazilië de beste dammer van de wēreld wön was. Det was in de show van tv-icoon Mies Bouwman. Jannes had thuus zelf gin tullevisie of radio en niks gin sjoege van de media en de extra vèrstarkende uutwarking doarvan deur zien zojuust vèrwörv’n roem.

(tekst loopt door onder afbeelding)

 

Hij kwaamp kats nie uut zien woard’n en wol nie vèrtell’n hoe oald as hij was want det was een domme vroage van Mies. Zien ‘gegevens’ waan immers bie de redactie bekend.

’t Optreedn was ’s aander’ndaags hèt gesprek van de dag in Nederlaand. Een paar moand laater leut Jannes zich kot opnemm’n in een psychiatrische kliniek. En det hielp want doarnoa zoln d’r nog velle tullevisie-optredens volg’n.

Jannes was ok heel muzikaal. In zien kamer steun een piano woarop hij goed uut de voet’n kon.

Hij had ok mooie citaatn zo as:

“Een dammer pröt nie velle. As hij noar de bakker gíét zegt hij bèveurbeeld; één brood.”

Of: “Een mēnse wut geboar’n, een mēnse gíét dood. Doartuss’n bestíét d’r de meugelukheid’ um te damm’n.”

Íén van de meest bekende gebeurteniss’n die Jannes met maakt’n was toen hij op weg noar een partieje damm’n veur het Nederlaands Kampioenschap in de trein in sloap was e-vall’n en zodoende de wedstrijd miss’n.

En wie weet, zat in diezelfde trein mèschien wè Rudy en hebt ze mekaare nog e-sprökk’n. Rudy was ok een bettie zo as Jannes, een einzelgänger die muujte met relaties had. Halverwēge zien lēēmsreis, deur de Engelse band Supertramp be-zöng’n as een denkbeeldige treinreis, kump hij d’r achter det ’t met de liefde nog steeds nie lukt is. En doar weet Rudy zich, ondaanks olle adviez’n, gin goed road met.

Op ’t laatst’n kump hij uut de bioscoop woarin hij e-vlucht was um de bittere warkelijkheid nie onder oogn te hóém zíén, um vèrvolgens zien lēēmsreis dan mà weer op dezelfde vóét voart te zett’n.

Rudy stíét op 1 van mien favorietere albums, ‘Crime of the Century’ (uut 1974). Nie alleent ’t vèrhaal is mooi mà ok de muziek, met o.a. schitterend pianospel det bie wieze van sprekk’n ok mà zo deur Jannes zelf e-speld had kön wēēn. Muziek die nog mooierder klinkt met een koptullefoon op, en let doarbie dan zeekes ok op ’t midd’nstuk met fan-tas-ti-sche opbouw.

(tekst loopt door onder afbeelding)

 

Jannes van der Wal stierf op 24 september 1996 in Groning’n, amper een wekke noadet hij de diagnose leukemie kreeg. Hij was töt slechts halverwēge zien lēēmsreis e-köm met zien 39 joar.

Rudy gíét veerder met zien lēēmsreis, elke keer weer aj dit prachtige líédtie beluusterd, ok à kump hij dan ok nooit veerder dan halfweg:

Video met Sallandse ondertiteling

Töt slot een ½ uur durende documentaire um nog is herinnering’n op te haaln àn een markant Nederlaands persoon. (Let op: de video start pas in noa 20 second’n)

Word supporter van HierinSalland

HierinSalland is voor, maar ook van Salland. Word supporters en ondersteun ons. Door mee te doen of met een kleine bijdrage.

Interessant? Deel het artikel

Blijf op de hoogte

Abonneer je op een of meerdere van onze nieuwsbrieven en ontvang elke week een update van de artikelen op Hier in Salland. Om de twee weken verloten we onder de abonnees om en om een pakket uit de biologische boerderijwinkel Overesch en de biologische Supermarkt in het Bos van Kleinlangevelsloo, beiden in Raalte. Bekijk de spelregels.

Meer over

Blijf op de hoogte

Abonneer je op onze nieuwsbrief en ontvang elke week een update van de artikelen op Hier in Salland. Iedere maand verloten we onder de abonnees een pakket uit de biologische boerderijwinkel Overesch in Raalte. Bekijk de spelregels.

Ook interessant

Sorry, geen nieuws gevonden

Laat een reactie achter

Het e-mailadres wordt niet gepubliceerd. Vereiste velden zijn gemarkeerd met *