‘Loat mà wēēn’ is Sallaands veur ‘Nevermind’, de titel van het 2de album van Nirvana uut Seattle. Het wönn’n uut-e-brach op 24 september 1991 en d’r bint meer dan 30 miljoen exemplaarn van vèrkoch. Volgens ‘t Amerikaansn muziektiedschrift Rolling Stone kump ’t album op de 17de plaase van de 500 beste albums evver ooit.
Zelfs à ken ie de band Nirvana of ’t album nie dan toch is de kaans groot dej de hoes wè is e-zeene hebt. Doarop ziej een baby den richting een dollarbiljet zwemt. De foto mut de teloargang van jeugdige onschuld symboliseern. De baby, toen 4 moand jong, is Spencer Elden, geboar’n op 7 februari 1991. Hij claimt velle las van de foto had te hem. Hij had d’r (as zuugeling) uuteroard gin toestemming veur geem en vind det hij misbruukt is.
De rechter hef zien eis, een fiks bedrag, echter of-e-weezn. Dit mede op grond van het feit det Spencer (kunstenaar van beroep) de foto meerdere keer’n teegn betaling oaverdoane hef, o.a. toen hij 25 was. Hij hef d’r dus zelf munt uut-e-sloane en doarbie ok nog is de titel ‘Nevermind’ op zien böste loatn tatoeëern.
Mà goed, terugge noar de muziek. Elk decennium hef we een paar van die albums die insloat as een bomme. Dit album dee det, wat de joar’n ’90 betreft, bie mie. Want Nevermind stíét vol met ech kneitergoeie muziek.
De bekendste hit van het album is Smells like Teen Spirit. ’t Betekend’n de deurbraak van Nirvana én van ’t Grunge genre. Muziekblad Rolling Stone vind Smells like Teen Spirit zelfs ’t beste nummer van de negentiger joar’n.
’t Grunge kenmarkt zich deur strakke eenvoudige rech-àn-rech-toe gitaarrock en Smells like Teen Spirit is doar gin uutzöndering op. D’r bint gin ingewikkelde akkoard’n en ok zeekes gin ingewikkelde tekstn, die eerder meer een vèrzameling van lösse termen bint, ol dan nie gerelateerd àn de jeugd. Teen Spirit is trouwens een Amerikaans deodorantnmark.
De orginele videoclip met ondertiteling kuj hier bewondern en beluustern. En tja, mèschien is’t oammoa nie zo biezönder. Mà hoe vaake aj dit nummer ok e-heurd hebt, ’t blif heerlukke muziek um is ēēm lakker finaal bie uut oe plaate te goan.
Onderstoande videoclip bevat ’t líédtie ‘In Bloom’, uuteroard ok van het album Nevermind en ok een grote hit. Behalvn det ok dit ech een héérluk nummer is, is de clip ok heel geinig. ’t Is een parodie op het nette keurslief woarin luu eind vieftiger joar’n nog zaatn met bèveurbeeld zuute familieshows op tullevisie. Mà dan noe met de ruige Nirvana bandleden as gast, keurig in’t pak en met ’t hoar netties in de brillantine:
Töt slot disse link die oe ’t heele album Nevermind teunt:
