Wat hebt presidentsvrouwe Eleanor Roosevelt en een Amerikaanse honkballer met mekaare van dóén ? Nou, toch bes nog wè wat.
De titel van dit Plaatnportret had net zo goed kunn’n wēēn ‘Mrs. Roosevelt’ um de simpele reden det det ok eers de titel was die Paul Simon àn zien líédtie e-geem had. En det was dan weer um de simpele reden det det líédtie oaver heur, mevrouw Roosevelt dus, gung. ’t Was een ode àn disse presidentsvrouwe.
(tekst loopt door onder foto)
Mà toen de film The Graduate uut zol kom wön Paul Simon e-vroagt doar een nummer veur te skríém. Doarop hef hij de titel vèraanderd in Mrs. Robinson, noar de hoofdpersonage uut de film. De film wön een succes en doarmet ’t liédtie van Simon and Garfunkel ok.
Mà goed. Noe die Amerikaanse honkballer nog die ik in de eerste regel ok nuum’. Det betreft Joe DiMaggio. Zien bienaame (doar bint ze in Lutt’nbarg ok gek op) was Joltin’ Joe, vrie vèrtaald; De Sensationele Joe. De man was een zönne van Siciliaanse immigrant’n, uut een vissersgeneratie. Mà op viss’n had hij ’t nie zo en dus gunge honkball’n. En hoe ?!!
Joe DiMaggio (* 25 november 1914 – † maart 1999) gruujn uut töt een fenomeen die 3 moal töt Meest Waardevolle Speller van de honkbalcompetitie uut e-roepm wön. Hij was 2 moal e-trouwd woaronder de laatste keer met Marilyn Monroe veur mà 9 moand’n. Laater waan ze van plan te hertrouw’n mà zo wiet kwaamp ’t nie; Marilyn Monroe pleegdn zelfmoard en Joe DiMaggio is nooit meer opniej e-trouwd e-wes. Toen hijzelf oaverleed waan zien woard’n: “Noe zal ik Marilyn gelukkig weer zien.”
(tekst loopt door onder foto)
Ol met ol kreeg de man een cult-status en zien naame wut dan ok in velle líédties e-nuumt. Bèveurbeeld o.a. in ‘We didn’t start the fire’ van Billy Joel, in ‘Centerfold’ van John Foggerty en in ‘Vogue’ van Madonna. En zien naame wut dus ok e-nuumd in Mrs. Robinson.
Paul Simon zegt zelf nie goed te weetn woerumme hij Joe DiMaggio in de tekst vèrwarkt hef mà det det in de loop van de tied vanzelf wè betekenis zol kríégn. Íén van die betekeniss’n die DiMaggio in ’t líéd Mrs. Robinson laater kreegn hef is det hij een veurbeeld was veur velle aandern. Hij was zóóó goed in zien vak det olles wat hij deed gracieus leek. Mà ok doarbuutn gunge nooit oaver de schreef en velle beroemdheedn gung dan ok graag met hum op de foto.
Een aandere betekenis die d’r àn geem wut is det DiMaggio een verbindende factor was, veurol in slechte tied’n. Net zo as hier een goed spellend Oranje heel Nederlaand op de kop kan zett’n – denk àn het E.K. van 1988 – zo was Joe DiMaggio de kjeal die de zörge van velle Amerikanen deed vèrgetn.
4 Zinnen wijdt Paul Simon àn Joe Dimaggio. Det lik weinig. Mà die 4 zinnen hebt in de loop der joar’n elke keer veur weer een aantal nieje mēnsn betekenis e-kreegn umdet ze behoefte hàn àn een held. En doar kan gin presidentvrouwe teegnop.
Video
