21 Oktober is ’t precies 45 joar leene det ’t 4de best vèrkochte album wēreldwied, in de plaatnwinkels kwaam te lign. De titel; Bat out of hell.
Noar ānleiding van ut oaverlijden van Meat Loaf eerder dit joar, had ik à een prachtig nummer van dit album bie ‘Hier in Salland’ onder de àndach e-brach.
Ik zalle de inleiding van die biedraage destieds noe nie herhaaln (die kuj nameluk zelf hier terugge lēēzn) mà manmanman wat een FAN-TAS-TI-SCHE elpee hef den Meat Loaf saam met Jim Steinmann produceert.
Beide heern waan d’r zelf ok wè met in hun sas en sie waan ut d’r beide oaver íéns det ‘For crying out loud’ ut ollerbeste liefdeslíédtie ooit was.
Of det ech zo is valt natuurluk hoas nie te zegn want dan muj appels met pēērn vèrgliekn.
Mà det ut een mēnse kipmvel kan bezörgn en det ut rechstreeks uut een groot hàrt van een grootn kjeal is e-zöngn die dit lied op warkeluk onnoavolgbare wieze vèrtolkt, det mag duudeluk wēēn.
For crying out loud is ontegenzeggeluk een parel van een monumentaal album.
Velle schik d’r met:
Klik hier voor de video
