Hoe minder d’r van iets is, hoe weerdevoller as ’t deurgoans wut, een gegeven det absoluut veur ’t fenomeen tied geldt. De band Bush (uut de Londense wijk Shepherd’s Bush) zingt hieroaver in Letting The Cables Sleep.
Gavin Rossdale is de zanger van disse band, voartvloeiend uut ’t Grunge-tiedperk, die muln joaren ’90 een paar bescheiden hitjes hàn. Rossdale is ok de skríéver van dit líédtie det oaver een moat van hum gíét die – destieds nog de dodelukke zíékte – HIV had op-e-loopm. Die moat van hum had det lange veur zich hoaln tötdet hij d’r nie meer onderuut kon ’t bekend te maakn. De zo weerdevolle tied die beide moat’n saam nog hàn, wön hierdeur nog kostbaarder.
De tekst van ’t líédtie is hier en doar wat cryptisch en ik heb de ondertiteling nie letterluk vèrtaald mà in plaase doarvan heb ik umskreem wat d’r met bedoeld wut.
Zo is de titel ‘Letting the Cables Sleep’ umskreem as ‘zonder iets te zegg’n.’
Met ‘never seem to get in the place that I belong’ hef Rossdale bedoeld det hij vaakerder bie zien moat had wull’n wēēn um saam te proatn want, zo zingt hij, ‘silence is not the way’. Op ’t laatstn zingt Gavin Rossdale ‘I’m a stranger in this town’ woarmet hij bedoeld det hij zich onwennig vuult umdet disse situatie vremd veur hum is en hij nie weet wat of d’r nog te wacht’n stíét.
’t Beste waj kunt dóén is gewoon noar ’t líédtie luustern en ’t op oe in loatn warkn. Veerder heb ik d’r nameluk niks meer àn toe te voeg’n ….
