Een paar wekke terugge had ik ut oaver joargetiedn, zie disse link en ok in mien niejste Plaatnportret is ut thema TIED.
Tied is íén van de meest boeiende fenomenen die d’r bestoat.
Want bèveurbeeld die paar secondn die ik neudig wasse um disse regel te tiepm die komt nooit, mà dan ok nooit meer terugge. Die bint veurgoed vot.
Mà ok, hoevelle tied ligt d’r nog véúr oons ?
Niemand die ut weet.
En, woar en wanneer begön de tied ?
Gíét de tied oltied ēēm hàd ?
As ik “noe” zegge is ‘noe’ à weer foetsie, vot.
Bie de tied wēēn en veurol blíém is ok nog nie zo eenvoudig. Doar zaatn ze heel vrogger à met te knooin.
Wus ie det precies 440 joar leene donderdag 4 oktober (in ut joar 1582 dus) direkt op e-volgd wun deur vriedag 15 !! oktober ?
Paus Gregorius nun 8stn had hier opdrach veur geem um zodoende de start van de lente weer terugge op 21 Meert te kríégn. Want in die daagn leupm de luu letterluk achter de feitn … euh, tied àn. En umdet nie in olle laane de tied tegeliekertied àn e-past wun waan vèschulnde luu toen ok ech nie BIE de tied.
Hoe det precies zit kuj via een prachtig interessant vèrhaal lēēzn via disse link.
Een biepassend líéntie bie dit hele vèrhaal is ‘Dust in the wind’ oftewel ‘Stof in de luch’ van Kansas.
Ut is e-skreem deur de gitarist van de band, Kerry Livgren uut, joawel, Kansas en in 1977 op plaate uut e-brach. ‘Dust in the wind’ is een tiedloze biedraage àn ut Plaatnportret van zoaterdag 15 Oktober 2022.
Video met Sallaandsn ondertiteling
Orginele video, die zeekes ok de meujte weerd is
