Op 9 september 1987 wönn’n Gerrit Jan Heijn, 1 van de topmann’n van de beroemde supermarktketen AH, ontvoerd deur Ferdi Elsas. ’t Was de 5de geruchtmakende ontvoeringszaake in 10 joar tied in Nederlaand noa o.a. Toos van der Valk en Freddy Heineken.
Ferdi Elsas was een slimme vent en had een goeie baane mà had probleem’n met gezag. Hij raakn warkloos, eigeluk deur een vuile streek van een aantal collega’s en had op een gegeevn moment geld neudig. Hij besleut töt ontvoering oaver te goan den hij zó goed veurbereid had det töt àn de ontknoping forensische experts dachn det d’r een goed georganiseerde criminele bende achter zat. Zelfs zien vrouw wus van niks.
Elsas kwaamp echter kot veur de daadwarlukke ontvoering töt de conclusie det hij zien slachtoffer mos vèrmoardn umdet hij ’t onderkomm’n in de boss’n bie Doorwerth vanuut Landsmeer onmeugeluk in zien eentie kon bewaakn zonder op te valn; een doad die hij op dezelfde dag van de ontvoering ok uutvoern. Gerrit Jan Heijn stierf op 56 joarige lēēftied.
Ferdi Elsas zelf stierf in 2009 op 66 joarige lēēftied noa een fietsongeval woarbie hij schept wön deur een … graafmachine.
Ontvoeringen geeft uuteroard oltied donders velle beroering en bie die van Gerrit Jan Heijn, woarvan de ofloop op 6 april 1988 pas duudeluk wönn’n, was de spanning in Nederlaand moandenlang veulbaar. Mà ok oaver een líédtie oaver een ontvoering, was destieds velle te doen.
Ik heb ’t oaver ‘Jeanny’ (uut 1986) van de Oostenriekse zanger Falco. Det was een knoert van een Europese hit mà nie zonder controverse.
In Europa waan een hoop DJ’s (woaronder Thomas Gottschalk) en ok radiozenders die de plaate boycott’n. Ok oonze eign Frits Spits weigern de plaate te dreijn. Men vönd det ’t líédtie o.a. geweld vèrheerlukken.
In de (orginele) videoclip draagt Falco een jasse met doarop de letter ‘F’ die zol vèrwíézn noar ‘M’, de titel van een film uut 1931 oaver een psychopathische kindermoardenaar uut Berlijn, die die letter op zien jasse had e-skreem.
In ‘Jeanny’ is ok een nieuwslēēzer te heurn; Wilhelm Wieben. Bie de ARD waan ze, mede deur de ophef in heel Duutslaand, echter nie e-díént van zien biedraage àn ’t líédtie en Wieben wönn’n op non actief e-steld.
Deur olle commotie vuuln Falco zich genoodzaakt um te reageern: ’t Líédtie is nie ofkomstig van een vèrkrachter, moordenaar of ontvoerder mà van een stalker die zien gedachtn de vrieje loop löt, zo zegge.
Falco hef nog een vèrvolg op ‘Jeanny’ e-maakt; ‘Coming Home – Part II, Ein Jahr Danach’. En hij was bezig met ok doar weer een vèrvolg op; ‘The Spirit Never Dies – Jeanny, the final’ woarvan hij nie met zol maakn det den uut-e-brach werd. Falco stierf op 6 februari 1998 deur een auto-ongeluk.
Rob en Ferdi Bolland bint de skríévers van ‘Jeanny’ (en trouwens ok van bèveurbeeld ‘You’re in the Army now’ van Status Quo).
Beide heern hebt op hun beurte ok prèbeert de trilogie te voltooin met ‘Where are you now – Part III’. Ok doarin kömp een nieuwslēēzer veur die vèrteld det de pliesie ànwíézing’n hef det Jeanny nog in lēēm is. Dit líédtie is echter nooit uut-e-brach.
Mà hoe dan ok lēēft Jeanny voart want ’t blif olles met mekaare een intrigerend vèrhaal.
Video met Sallaandsn ondertiteling:
Orginele video:
Met daarin de bewuste letter ‘F’ op de jas die refereert aan de genoemde film ‘M’. Maar ook met de geschorste Tagesschau nieuwslezer Wilhelm Wieben.
