Rubin Carter is op 6 mei 1937 geboar’n in Clifton, New Jersey (V.S.). Hij stierf in Toronto op 20 april 2014. Nee, Carter was gin artiest mà een bokser die in zien tied töt 1 van de best’n ter wēreld beheur’n in’t midd’ngewicht. Zien bienaame was ‘The Hurricane’.
(tekst lup deure onder foto)
Tijdens zien bokscarrière behaald’n Rubin Carter 27 oaverwinning’n woarvan 19 deur een knock-out. In 1993 kreeg hij van de Wēreldboksboond een erekampioenstitel in het midd’ngewicht. Mà veurdet hij die titel kreeg maakt’n hij een ongeleufluk groot drama met.
In 1966 wön Rubin Carter nameluk arresteerd op vèrdenking van medeplichtigheid àn een 3-voudige moard. Wat was nameluk ’t geval ? In de vrogge mon van 17 juni 1966 wön in café ‘Lafayette Grill’ in Paterson (New Jersey) 5 luu beschöt’n.
Kastelein Jim Oliver en Jim Ropars en Fred Nauyoks stierv’n mà Hazel Tanis en Bill Marins overleefden het geweld. Bill Marins wön in zien heufd e-raakt en verleur een oog. Hij mos laater met zien aandere oog de dader identificeern.
Íén van de belangriekste getuugn was Patricia Valentine, die teegnoaver ’t café woon’. Een aandere belangrieke getuige was Alfred Bello. Hij zol de schootn heurd hem toen hij richting de bar liep um sigarett’n te koopm.
Rubin Carter wön deur een compleet blanke jury in 1967 vèroardeeld tot lēēmslang mà ok laater (in 1976) nog een keer deur een jury met ok zwatn d’r in.
Uuteindeluk wön Rubin ‘The Hurricane’ Carter in 1985 vrieloat’n … zonder vriesproak.
Hij gung zich inzett’n veur luu die ten onrechte vaste zaatn. En töt op de dag van vèdaage bint d’r zowel luu die twiefeld àn zien schuld as àn zien onschuld.
Mà eigeluk vèrtel ik dit olles een klein bettie veur niks want Bob Dylan dut feiteluk ’t zelfde in een líédtie det op 21 november 1975 is uut-e-brach, precies 48 joar leene dus.
Bob Dylan is een van de productiefste artiets’n ooit en hij wut beschouwd als íén van de grootste songwriters van de Verenigde Staten in de 20ste eeuw. Velle van zien líédties oaverschreidt de zeg mà ‘commerciële’ gangbare duur en ‘Hurricane’ is d’r doar íéne van met 8.33 minuutn.
In 1999 kwaamp d’r een film uit over Rubin Carters lēēm met Denzel Washington in de hoofdrol. Beeld’n van die film, met ok echte fragment’n van een boksende Rubin Carter, begeleid de muziek en tekst van Bob Dylan. Een tekst woarmet ik trouwens nog wè ēēm zuute wes heb want ok doarin, in hoeveelheedn tekst, was/is Dylan nie standaard.
Dylan hef van ‘Hurricane’ een prachtig líéd e-maakt mà op enkele punt’n de tekst wè wat vèrdreijt met de warkelukheid. Zo wut bèveurbeeld getuuge Bello d’r van beschuldigd samen met Arthur Dexter Bradley de kassa e-plunderd te hem terwijl Bello (teegnoaver de jury) noar eig’n zegg’n kwaamp um sigarett’n te koopm.
Mà goed. Noe dan mà de video, met tijdens ’t nummer heerlukke uptempo percussie en met steeds weer terugkerende prachtig klinkende vioolklank’n van Scarlet Rivera en natuurluk met Sallaands’n ondertiteling.
Video
