Een sköffie leene zag ik op NGC of Discovery een boeiende documentaire oaver Amelia Earhart. Op 20 mei 1932 begön ze succesvol, as piloot, àn een vlucht oaver de Atlantische Oceaan. Doarmet was ze de 1ste vrouw ooit – Charles Lindbergh had det 5 joar eerder e-flikt – en det ok nog is solo. Dit huzarenstukkie herhaaln ze, as 1ste persóón ooit, in 1935, mà dan zelfs oaver de Grote Oceaan.
Amelia’s ambities kend’n letterluk gin grēēnzn en dus begön ze in 1937 àn de langste vlucht ooit, een route van 47.000 km rondum de evenaar. Heur motto was:
“Begrijp alsjeblieft dat ik me heel goed bewust ben van de risico’s. Ik wil het doen omdat ik het wil doen. Vrouwen moeten dingen proberen, zoals mannen dingen hebben geprobeerd. Als ze falen, is hun mislukking alleen maar een uitdaging voor anderen.” (Amelia Earhart, 1937)
Noadet ze à 35.000 km of e-legt had begön ze, samen met navigator Fred Nooman, àn ’t laatste stuk van 12.000 km oaver (net as 2 joar eerder) de Grote Oceaan. Hun eindbestemming hebt ze echter nooit bereikt en oaver hoe ’t misgung bint vèschulnde theoriejn, wat een uuterst interessant vèrhaal oplēēverd dej mà is op mut zuukn.
Op 5 januari 1939 wun Amelia doodvèrkloard noadet ze sinds 2 juli 1937 vermist was. Sie was compleet van de aardbodem vèrdween en ’t mysterie blif voartbestoan töt op de dag van vèdaage.
De vèrdwíéning van Amelia was absoluut nie vriewillig.
Dit in teegnstelling töt wat Thom Yorke (Radiohead) zich wēēnstn toen hij d’r tijdens een tournee genog van had. Zien collega Michael Stipe (R.E.M.) adviseern hum toen: ”Trek de loekn noar beneedn en blíéf zegn; Ik binne hier nie, dit gebeurt nie.”
’t Líéd wat Thom Yorke vèrvolgens skrif weergef ’t gevuul van een iemand die uut zien lichaam treedt, net as, wie weet Amelia Earhart ooit dee en mèschien doarbie noe nog steeds wè rondvlög.
Radiohead hef prachtige nummers e-maakt mà eerluk e-zeg vin ik hun uutvoering van ‘How to disappear completely’ niks àn. En ik binne deurgoans (in 99% van de gevaln) ok gin fan van covers umdet die meestal nie de bosschop van de skríéver van ’t nummer goed oaver kunt brengn.
Toch kump de Noarse zangeres Ane Brun in de buurte. Dus ik stelle heur graag àn uulle veur d.m.v. dit nummer.
‘How to disappear completely’ is (natuurluk) ok op heel velle aandere situaties toe te pasn dan woar Thom Yorke ’t oaver hef, nameluk de soms slopende tournees.
Leg dit líédtie in de uutvoering van Ane Brun bèveurbeeld is oaver het vèrhaal van Amelia Earhart en heur mysterieuze vèrdwíéning hèn.
En goa dan in gedachtn is noar 1937 en stel oe die onmetelukke Grote Oceaan veur met hier en doar een eilaandtie en det ie oe in een situatie bevindt woar aj volstrekt nie wult wēēn; I’m not here, this isn’t happening, I’m not here … of toch we ?
Video met Sallaandsn ondertiteling
Hier een live video
