De harfst is kwa weerbeeld nog nie begönn’n mà à wè volgens de klimatologische, astronomische en/of meteorologische kalender. De daagn wut kotter, de oamde en nachn langer. De duusternis krig zotoeverdan de oaverhaand. De duusternis wut o.a. bezöng’n deur een vrouw die de dochter was van een Hongaarse violist en een in Duutslaand geboar’n moeder uut Frans-Russische olders. Kuj ’t nog volg’n ?
Ik heb ’t oaver Mariska Veres, geboar’n op 1 oktober 1947 in Den Haag. Muziek was onderdeel van heur gezinslēēm en zo as menigeen wellich ok van zichzelf zal herkenn’n nam ze as kind à líédties van de radio op met een bandrecorder. Helen Shapiro en Cliff Richard waan heur idooln.
In 1967 richtn Robbie van Leeuwen, die The Motions vèrloatn had, de band Shocking Blue op. Hij had Barry Hay op ’t oog as zanger van zien nieje band mà den bedankt’n veur de eer. Robbie’s antwoard was det Barry doar nog spiet van zol kríégn. Fred de Wilde wönn’n uuteindeluk de zanger van Shocking Blue mà toen den in militaire díéns mos kēūs van Leeuwen veur een zangeres, Mariska Veres.
Shocking Blue had velle succes met o.a. de 1ste nummer 1 hit ooit van Nederlaandse ofkomst in Amerika. Det was met Venus en ’t joartal was 1969. In 1986 haald’n Venus opniej de 1ste plaase in Amerika, dit keer in een uutvoering van Bananarama. Aandere grote hits van Shocking Blue waan o.a. Send me a postcard, Never mary a railroadman, Mighty Joe en Blossom Lady.
Eerder-enuumde Barry Hay deed ’t later met Golden Earring natuurluk ok goed. Ok sie hàn een nummer 1 hit in de V.S. met Twilight Zone in 1982 en sie hebt doarnēūst nog 4 aandere noteringen aldoar had.
In 1974 heult Shocking Blue op te bestoan, eigeluk deurdet Robbie van Leeuwen d’r uut stap’n vanwēge geelzucht. Sie bint doarnoa nog wè is weer bie mekaare wes mà zo as ’t was werd ’t nooit meer. Zo oaverleed drummer Cor van der Beek op 8 april 1998 op 48 joarige lēēftied.
Mariska Veres is ol die joar’n blíévn zing’n mà op een gegeven moment nam heur gezondheid of. Slechts 3 wekke veur heur oaverlijden ontdekk’n de arts’n det sie leed àn galbloaskanker. Sie stierf op slechts 59 joarige lēēftied op zoaterdag 2 december 2006. Sindsdien klinkt Hello Darkness toch een bettie weemoediger dan det ’t al deed.
