Bryan Holland, better bekend as Dexter Holland, is de zanger van de punkrockband The Offspring. Hij en zien vrouw waan ànwezig bie en dus getuuge van een schíétpartieje van bendeleden in een iessalon in Huntington Beach, Californië. Doarbie veuln gin dodelukke slachtoffers mà beide waan donders e-schokt deur ’t gebeur’n.
’t Idee det de dood zó dichbie was, was een moment det zien lēēm vèraandern aldus Dexter Holland. ’t Deed hum noadenk’n oaver starv’n en vèrdríét, oaver hoe ’t zol vuuln, ok veur aandern, as zien lēēm zo mà eindig’n (kon).
Behalv’n veur Dexter Holland en zien vrouw is ’t ok veur heel velle aandere luu gin onbekend fenomeen as oe lēēm van de íéne op de aandere seconde finaal op de kop e-zet wut.
Bèveurbeeld as d’r pats boem zo mà iníéns iemaand uut oe nēūste umgeving, deur wat van oarzaak dan ok, wegvalt. Dichbie in Lutt’nbarg, mà ok in de buurtdörpm, kent wie doarvan helaas tevelle veurbeeld’n, uut ’t vèrleedn en ok uut recentere tied’n.
’t Totaal onvèrwachte maakt det de grond oe onder de vóét’n votzakt. ’t Ontregeld oe volkomen en olles in oe lēēm is plots nog slechs biezaake.
De emoties roast oe deur de kop mà ok deur oe lichaam; ’n vèrlammende vèrmuuitheid maakt zich van oe meester.
En vin dan mà is een weg um doarmet umme te goan, um die biezaakn toch weer van belang te loat’n wön en um nie in ’t moeras van teneergeslagenheid weg te zink’n.
Dexter Holland hef die weg e-vön en wè deur een líédtie te skríém oaver een plotseling vèrlies.
(lees verder onder afbeelding)
Zo as e-zeg is The Offspring een punkrockband en hun líédties kenmarkt zich vaake deur ‘flink geschreeuw’. Mà mèschien is ’t juust wè heel heelend um is flink van oe of te schreeuw’n en oe emoties d’r uut te gooin.
Hoe dan ok bèskrif ‘Gone Away’ goed de machteloosheid, de roadeloosheid en vèrtwiefeling die oe treft as oe wēreld in amper een oogwenk totaal in duig’n valt.
Luuster d’r mà is noar en desnoods schreeuw ie doarbie met!
(lees verder onder afbeelding)
Video
In dit líéd Gone Away zingt Dexter Holland oaver Black Roses en Hail Mary’s. Det laatste, de Hail Mary’s bint Lelies mà betekent ok ‘Wees Gegroetjes’ (gebed).
D’r is ok een rustigere (piano) versie van ‘Gone Away’ en die kuj hier beluustern:
