En dan ein-de-luk is’t weer zo veer; ’t Feest der Feestn is doar! Met weer een donders mooi programma, nun heeln dag deur, olle daagn en veur elk wat wils. Zie: www.luttenbergsfeest.nl
(tekst loopt door onder afbeelding)
Nun rooin droad veur mie is 4 daagn lange lakker kletsn, nuiln en ouwehoern met bekendn diej wekkeluks ziet mà ok met luu diej mà íénmoal in’t joar treft, juust op ’t Feest. Met ’n fijn biertie d’r bie, det ok natuurluk.
’t Ollerollermooiste onderdeel van’t Feest is zonder twiefel ’t Gatgraavn. ’t Is pure heroïek. Kracht, techniek, conditie, deurzettingsvèrmoogn en scharpe batsn en schöpm bint de deurslaggevende factoarn veur succes. Succes vèrtaald in ruum 2, 2½ meter de groond in, in 20 minuutn tied. Goa d’r mà àn stoan.
Noe ‘mos’ ik doar, in kader van mien wekkelukse Plaatnportret, natuurluk een líédtie bie bedenkn en ik kwaame uut op Supermassive Black Hole van de band Muse, ofkomstig uut ’t zuudwestn van Engelaand (en die onlaangs nog in Nederlaand waan).
Supermassive Black Hole (uut 2006) is vèrtaald in goed Sallaands een ‘superzwoar zwat gat’. Ie weet wè, van die gaatn diej ok in t heelal hebt en die een zukke starke àntrekkings- of better zwoartekrach hebt det zelfs ’t lich d’r noar toe trökn wut.
Toch kan ik oe wè vèrteln det de superdíépe zwatte gaatn die de gatgravers graaft ok oaver een kneiterstarke zwoartekrach bezit; in de loop der joaren – 41 um precies te ween – kon menige graver alleent met hulp van aandern nog bevriejd wönn’n uut zo’n metersdíép gat.
Mà beste luu, uulle mut veerder zelf mà beoardeeln of ’t nummer van Muse een bettie past bie dit mooiste onderdeel det ’t Lutnbargse Feest ríéke is. Ik goa d’r nameluk nie meer oaver vèrteln want ik heb doar d’r gin zin àn. Doar bin’k te onrustig, te ongedurig veur.
Ik MUT d’r nameluk op àn, noar ’t Feestterrein. D’r is gin hoaln àn. Ik woone d’r 150 meter vàdan en de aantrekkingskrach hef een onweerstoanbare onmeteluk machtige uutwarking op mie.
De drang is te groot, ik mut vot …. ajuu !!
