Op 20 juli 1964 zag Chris Cornell ’t lēēmlicht. Mà det lēēmlicht zol in latere joaren veur hum nie oaltied uitbundig schíén. Want hij hef gitzwatte periodes met-e-maakt. Hij had d’r een aantrekkingskracht veur zo as hijzelf zegt en zingt; hij veul op zwatte daagn.
Chris Cornell was de zanger van o.a. Soundgarden en Audioslave, ’t zwoardere wark dus. Ok hef hij meerdere solo-albums uut-e-brach, de gelegenheidsband Temple of the Dog op-e-rich en de titelsong van de Bondfilm Casino Royale (2006) e-skreem.
Hij was een begenadigd zanger, wat heet, hij was een geweldige zanger met een stembereik van 4 octaven !
Lēēzers van ’t tiedschrift Guitar World reupm hum uut töt beste rockzanger ooit en hij stíét op de 4de plaase van Metal zangers. ’t Àntoongevende Rolling Stone reup hum uut töt de 9de beste leadzanger ooit.
Mà ’t lēēm van Chris Cornell kend’n, zo as e-zeg, ok dieptepuntn. Tusn zien 9de en 11de joar leed hij àn een zwoare depressie. Zien oale luu scheid’n toen hij 14 was en een joar later gung hij veurtiedig van skóéle. Muziek was zien uutweg en ok een maniere um zien vèrlēēgenheid te oaverwin en um contact te kom met aandere mēēnsn. ’t Warktn therapeutisch veur hum.
Superunknown (uut 1994) is ‘t 4de en best vèrkochte album van Soundgarden en doarop kuj ’t nummer Fell on black days vin.
’t Gíét, aldus Chris Cornell, oaver ’t besef dej oe extreem ongelukkig vuult en de somberheid, veurol ok in de stemme, druipt d’r dan ok vanof: “D’r waan periodes det ik plotseling ’t gevuul had det ’t nie goed gung in mien lēēm … de veuruutzichtn waan vèraanderd terwijl olles in wezen ’t zelfde was” zegt hij oaver ’t ontstoan van Fell on black days.
De angst, de innerlukke strijd, eenzaamheid en zinloosheid, ’t gevuul hem een aander in de steek te hem loatn. En oaver de wens dit te wuln kun’n vèraandern; I sure don’t mind a change …. ’t kump oammoa veurbie in dit letterlukke en ok duustere lēēmslied.
D’r zit wellich zelfs een vèrglieking in met de maniere woarop hij velle joaren laater àn zien einde zol kom; hands are for shaking, not tying, not tying want Chris Cornell zol deur zelfdoding (op 18 mei 2017) nie oalder wun dan 52 joar.
Klik hier voor de video
