Van’t weekend wut zo as ze det zegt ‘de tied vèrzet’. En wè 1 uur veur-uut, want ut is veur-joar. Tied vinne ik een fascinerend fenomeen det ik à is eerder in een Plaatnportret ter sprake brach hebbe, zie hier: https://hierinsalland.nl/plaatnportret-aphrodites-child-spring-summer-winter-and-fall/
Wat is tied en wanneer begon de tied, woar gíét de tied op àn en wat hef de tied oons op e-lēēverd ? Mèschien wè de beste video die dit olles vèrbeeldt is denne die ut nummer Echoes van Pink Floyd ondersteunt.
Ut begint met een kjeal die vèrteld oaver ut ontstoan van’t heelal. Doarnoa wut ut ontstoan van de Aarde in beeld e-brach en ut ontstoan van ut lēēm, woarnoa de heele evolutie, zo as bioloog Charles Darwin h’m in The Origin of Species uut 1859 bèskreem hef, op prachtige wíéze in beeld weergeem wut. Wiederop in de video wut ut, as de tied vèrstrekn is en ànbelandt is bie de 20ste eeuw en bie W.O. II luguber met (en doarveur mut ik ech waarschuwn !!) schokkende beeldn. En nog weer veerder wut ut wellich ok wat langdroadig. Aj dan ofhaakt kan ik det bes begriepm alhoewel ut slotstuk ok weer mooi is en de circel rond maakt.
In de Plaatnportretn dreijt ut natuurluk in de eerste plaase um muziek en die muziek van Pink Floyd is zo aj van ze kunt vèrwachn; een creatieve, non-commerciële compositie met die typische sound woarbie nie op tied is bezuunigd.
De heren van Pink Floyd volgdn wat det betreft hun muzikale hātte en nie de portemonnee alhoewel ze oaver det laatste ok heemoa niks te klaagn hebt.
Umdet de video (25 min.) te lang was um h’m, met mien beperkte technische kennis, te downloaden is disn zonder ondertiteling:
Lange video ZONDER Sallandse ondertiteling
Echter, in disse twidde korte video kuj wè een ondertiteling metlēēzn:
Korte video MET Sallandse ondertiteling
Hoe snel as de tied gíét
hangt of van
àn welke kaante aj oe,
met dekselse hooge nood,
van de W.C.deure bevindt
