De beëdiging van ’n nieje Amerikaanse president vind oltied plaats op 20 januari. Mà det is ‘pas’ sinds 1937. Doarveur was’t oltied op 4 meert, um precies te wēēn 33 moal, sinds 1793, woaronder de beëdiging van een zekere Martin van Buren in 1837.
Noe goa ik ’t doar wieder nie oaver hem mà ’t bruggetie is in ieder geval e-maakt met de president woar as de ‘4 Non Blondes’ oaver zingt, die ok uut Amerika komt, uut San Francisco um precies te wēēn.
De band hef mà 5 joar bestoane en stopm d’r met toen zangeres en gitarist Linda Perry in 1994 veur ’n solocarrière gung.
‘What’s Up’ was een knóért van een hit en ’t album woar det op stíét, ‘Bigger Better Faster More’, zit vol met kneitergoeie songs zo as ok Dear Mr. President.
Dear Mr. President gíét oaver de bedroevende omstandigheedn woaronder velle Amerikanen lēēft.
Video 4 Non Blondes
Mà ik wul ’t ok nog effies oaver Linda Perry (Springfield, Massachusetts) zelf hem. Want disse vrouw is mie wè (bie hooge uutzondering), een dubbel Plaatnportret weerd. Sie is van 15 april 1965 en geboarn uut Portugese en Braziliaanse oalders.
Een velzijdige vrouw want behalvn zingn en gitaar speln skrif en produceert ze ok muziek.
Nēūst veur de ‘4 Non Blondes’ hef ze det ok e-doane veur Pink (Try This en M!ssundaztood), Sugababes, Gwen Stefani, Kelly Osbourne, Courtney Love, Christina Aguilera (Beautiful en Hurt) en Celine Dion.
Ik vinne Linda Perry een fantastische stemme hem en nog meer, sie legt een geweldige energie en emotie in heur líédties. Juulle hebt det in ‘Dear Mr. President’ kun heurn mà ’t volgnde nummer is wat mie betreft nog mooier.
’t Betreft een opname uut de ‘2 meter sessies’ van Jan Douwe Kroeske en det ’t live is blik bèveurbeeld uut ’t feit det Linda Perry hier en doar de tekst verdreijt. Mà ok te zien is det ze as vanouds heur heele ziel en zaligheid d’r ingooit.
Kiek en luuster doarumme noar ‘In my dreams’.
Video Linda Perry
