Nou ut was mie wè ’n wekke zo met Queen Elizabeth die ’t niejs domineern en met (hè hè, eindeluk koning) Charles. En dan blíéve wie a.s. dinsdag ok in ‘koninklukke’ sferen met Prinsjesdag. Ik weet nie wat ut argste is van dit olles … hoewel, det wee’k eigeluk wè.
Det is zonder twiefel Prinsjesdag.
* De dag det ze niejs brengt wat à lange uut e-lekt is.
* De dag det de koning iets veur mag lēēzn woar as hij niks oaver te zegn hef (ik zolt nooit nie doen, loat ze ut bekiekn).
* De dag det de íéne minister of geneudigde nog gekker uut e-döst is met ’n belacheluk heufddeksel dan de aander. As of ze oammoa iets te viern hebt en de bosschop veur ut kommende joar íén groot feest is.
Mà wuulle weet wè better.
Aj de media volgt (en det doe ik) dan weej det menige boer, burger en ondernemmer de toekomst zeer zeer zörgeluk inzöt.
Luu zit met de haane in’t hoar, bevreesd veur wat d’r, op ollerlei frontn, kom gíét. Bevreesd veur hun bedrief, veur hun personeel, veur hun wichter en veur zichzelf.
En loat ik nie tevelle woardn vuil maakn oaver de oarzaak van disse ellende, behalvm dan disse 3 woardn; ministers in combinatie met incompetentie én onwil !!
Ik hoppe luu det uulle oammoa de rugge rech weet te hoaln en de kop boavm water. Geef nóóit op, wēēs stark !
En doe, zo as Joan Osborne mooi vèwoard, ut licht nie uut.
Knöp goed in oe oarn en weet dej nie alleent bint !
Klik hier voor de video
