Heb ie ooit wè is e-heurd van Hernán Cortés de Monroy y Pizarro Altamirano, 1ste Markies van de Vallei van Oaxaca ?
Nou, det had ik töt veur kort (ok) nie mà dankzij dit Plaatnportret wè. Hernán Cortes (*dec. 1485 – †2 dec. 1547) was een Spaanse veroveraar. Zien optreden leidd’n de val in van ’t Riek van de Azteken (in Mexico) en de Spaanse kolonisatie van Amerika. Neil Young (uut Toronto, Canada), die vèdaage op 12 november 78 joar’n young e-wön is, hef doar een líédtie oaver maakt.
En ik valle drekt met de deure in huus; de keuze uut zien repertoire is reuze mà wat mie betreft is zien líédtie in dit Plaatnportret nun mooistn uut zien heeln lang’n carrière, die oaverigens nog steeds voartduurt. Oaver zien cariere kuj wè een bóék skríém en det zal ok vaste à wè is gebeurt wēēn. Ik hoal ’t hier noe bie zien líéd.
(Tekst lup deure onder foto)
Disse hele inleiding gíét oaver ’t nummer ‘Cortez the killer’ en uut die titel blik det Neil Young vind det den kjeal Cortez meer fout dan goed e-doane hef. Hoewel de Azteken ok gin lieverdjes waan wut die echter deur Young umskreem as oarige, sociale, behulpzame mēns’n.
Mà goed, doar kuj van olles van vin, mà ik weet nie of ‘t noe oammoa zovelle uutmaakt det tekst wat geromantiseerd is. De muziek van ’t nummer uut 1975 is nameluk zóóó magistraal mooi det de tekst d’r hoast nie meer toe dut.
’t Nummer stíét op ’t album Zuma én … ’t stíét ok op nummer 39 van de 100 beste gitaarsolo’s volgens ’t blad Guitar World.
Op ’t album ‘starft’ de muziek noa 7½ minute ‘vot’. Dit zol gebeurt wēēn deurdet een mengpaneel ’t begeem had. In de live versie is dit (uuteroard) nie zo.
Dus muj d’r mà is goed veur zitt’n, eers veur de album versie met Sallaands’n ondertiteling.
En dan as toetje, mèt slagroom, veur de live versie.
Die muj ech zíén en luuster’n, want Neil Young gíét live compleet lös en volledig op in zien gitaar.
Video met Sallaands’n ondertiteling:
Schitterende live versie:
