Op 6 augustus 1927 wun Ibrahim Ferrer geboarn, nota bene in een nachclub. En noe denkt uulle, wie is det noe dan weer ? Nou, Ibrahim zien muziekmoatn waan o.a. Company Segundo, Rubén González en Pio Leyva. Klinkt Spaanstalig hè ? Nou det is ’t ok want ik hebbe ’t hier oaver de Cubaanse ‘Bueno Vista Social Club’ band, op-e-richt deur Ry Cooder en vernuumt noar een veurmalige club uut Havana.
In 1997 hàn ze een wereldhit met Chan Chan det à in 1984 e-skreem is deur bandlid Company Segundo. ’t Is nie meer of minder dan een liefdeslíédtie geïnspireerd deur een kindervèrhaal uut zien jeugd. Doarin bint 2 jonge luu zaand àn’t haaln veur de bouw van een huus. Mà deur ’t zeev’n van ’t zaand op ’t strand maakt Juanika sensuele bewegingen en kan Chan Chan zich nie meer inhoaln. Mà nee nee luu, die beeldn kriej in onderstoande video niet te zíén. Waj we kríégt te zíén bint ech schitterende typische stroatbeeldn van een Cubaanse stad en de mēēnsn die d’r lēēft.
En de heerlukke muziek, met o.a. een slide gitaar bespelt deur Ry Cooder zelf en een fantastische trompet (deur Manuel Mirabal) is ok ooh zo mooi. De beeldn en muziek vèrstarkt mèkaare op sublieme wíéze en schept een heerlukke nostalgische sfeer.
Wat de ‘Bueno Vista Social Club’ nog biezónderder maakt is de lēēftied van de bandleden. ’t Bint oammoa 70-ers, 80-ers, joa zelfs íéne van bienoa 90 !!
En ’t grappige doarvan is det 1 van de kwisvroagn van “de kwis die deur iederéne wunn’n mut kunn’n wönn’n” ok oaver lēēftiedn van artiestn gíét.
Dus geef oe nog ēēm gauw op veur de kwis (6 augustus, 15.00 uur in Elckerlyc) via www.luttenbergtop700.nl
Luuster, kiek en geniet doarnoa van dit uuterst sfeervolle pareltje uut Cuba deur op https://youtu.be/eZTidJx6twc te klikn.
