Wēreldwied bint d’r in de ofgeloopm decennia miljoenen hectare bos e-kapt. Um-e-rekkend 1 voetbalveld per seconde !! Ok in Nederlaand bint d’r, m.n. de laatste joar’n, duuzenden hectares bos plat e-gooit, per joar 4000 ha.
En woerumme ? Nou, umwulle van íén of aandere salamander, kevertie, tonn€n vèrslindende korhoenders, ’t creëren van zaandvèrstóévingen, etc. As of de aandere flora en fauna in detzelfde bos d’r nie toe dóét.
De diverse Landschapsorganisaties zo as Landschap Overijssel en Staatsbos’beheer’ meent op gebied van natuur olles noar hun hand te mön en könn’n zett’n en duuzenden boom’n plat te mön gooin zo as in De Bergense Duinen, de Sonse boss’n, boom’n langs het Noordhollands Kanaal, boom’n in de Europoort maar ook dichterbie in De Lemelerbarg, de Holterbarg en het Boetelerveld. Het is oammoa in het kader van de Nationale Bossenstrategie waar € 1½ miljard met e-muujd is en joa, dan mut det pöttie natuurluk wè lēūg hè ?
Okee okee, d’r wut ok wè nieje boom’n àn-e-plant mà nie zovelle as det d’r kapt wut en veurdet die boom’n groot bint bi-j een mēēns’nlēēm wieder. De achteloosheid woarmet menige eeuwenoale boom velt wut is schrijnend en teunt een totaal gebrek àn respect doarveur.
Mà joa, zegt de ‘gruune luu’ dan, die boom’n wut gebruukt veur biomassa. Mà wus ie det biomassa een hogere CO2 uutstoot gef dan kool’n- en gasverbraanding ? Nee ? Nou, dan weej ’t noe !
En doarmet kom ik bie CO2. Want as CO2 warkelijk zo bedreigend is veur ’t klimaat woerumme kappe wie dan – en dan hoal ik ’t mà effies bie Nederlaand – duuzenden hectare bos, elke joar weer, um ze ok nog is te vèrbraan? Juust diezelfde boss’n die det zogenaamde gevoarlukke CO2 uut de luch haalt en wè zo’n 25 kilo per joar per boom. Doarnēūst zörgt ontbossing ok nog is juust veur meer hitte en dreugte.
’t Antwoard op de vroage hierboav’n is det in warkelukheid de vèrhoogde CO2-waarde in de atmosfeer heemoa nie de VÈROARZAKER van de temperatuurstijging op Aarde is mà juust ’t GEVOLG.
De huidige CO2-concentratie is 1 van de leegstn in de geschiedenis van de Aarde en doarbie kump ok nog is det wie bie een te leege concentratie doarvan oammoa ’t loodje legt.
De huidige temperatuurstijging op aarde is à goande sinds eind van de 17de eeuw, à lang veur de industrialisatie; wie bint uut een koale periode àn’t klimm’n. En trouwens, nog een feit; een mēēnse zonder kleding, beschutting en zelf gecreëerde warmtebron (energie) starft àn onderkoeling bie een temperatuur beneed’n de 20° C.
Det ’t in Afrika oonderhaand smoarhíéte wut is weer wat aans. Noar det continent is in totaal inmiddels € 150 miljard àn ontwikkelingsgeld e-goane en ’t hef niks e-hölp’n. Ik denk det ’t een goed idee is um ol die klimaatmiljarden van noe, doar mà is te goan investeern in bèveurbeeld boom’n-ànplant. Mà dan wè onder toezich zodet ’t geld nie steeds weer in de haane van de corrupte machthebbers doar beland. Mèschien kunt Jetten en Timmermans dan wè help’n pott’n.
Nou, det was veurlopig genog ‘politiek’ gelul. Vèdaage (21 april) is Robert Smith joarig en loat hij noe toevallig ok net oaver een bos zing’n. Een bos woarin hij de weg kwíét is e-raakt, net as ol die op geld en macht beluste klimaatgestoard’n.
Video met Sallaands’n ondertiteling:
