Tom Petty is van 20 oktober 1950. Zien deurbraak kwaam, saam met zien band The Heartbreakers, in 1976, ’t joar det ik veur ’t eerst noar de Middelbare Skóéle gung. Vanof die tied kwaam ik deur toedoen van ‘alternatieve’ klasgenootn ok velle met ollerlei aandersoartige muziek in ànraking mà Tom Petty is onmiskenbaar oltied 1 van mien favorietn wes en e-bleem.
Ik wit eigeluk nie goed hoe ik zien muziek mut umskríév’n mà det ’t lakker in’t geheur ligt is onmiskenbaar. Bekende hits bint o.a. Refugee, Free fallin’ en Mary Jane’s last dance.
Saam met Stevie Nicks van Fleetwood Mac hef Tom Petty ok nog een líédtie zöng’n, Stop dragging my heart around en ok was de beste kjeal lid van The Travelling Wilbury’s, een gelegenheidsband die besteun uut nie de minstn, nameluk Jeff Lynne, Bob Dylan, Roy Orbison en George Harrison.
Tom Petty is nie oald e-wönn’n. Hij stierf, een wekke noa een uitgebreide toernee, àn een hartstilstand op 2 oktober 2017 deur een oaverdosis medicatie die hij sliktn vanwēge diverse lichamelukke klacht’n.
A face in the crowd is 1 van de schitterende nummers die hij noaloat’n hef. ’t Was ok ’t openingsnummer van de Top700 2022.
(tekst loopt door onder afbeelding)
Stefan Klein Koerkamp, lid van ’t D.J.korps van dit meraakels goeie muziekevenement, hef speciaal veur die Top700 de videoclip bewarkt en e-mixt met oammoa fotoportrett’n van Lutt’nbargers.
Ik hebbe d’r umwulle van dit Plaatnportret een ondertiteling àn toe-e-voegd mà det is in feite heemoa nie zo belangriek. De muziek sprekt nameluk veur zich en de beeld’n op zien minst net zo … of mèschien nog wè meer.
Beeld’n, foto’s van tal van mooie, lieve Lutt’nbargse mēēnsn. Helaas bint d’r oons doar inmiddels à een aantal, net as Tom Petty, van ontvall’n wat disse video nóg mooier en nóg waardevoller maakt.
De 1ste veurbereiding’n van de Top700 2024 bint noe ganks. ’t Kan hoast nie aans of deze prachtige versie van Face in the crowd, een eerbetoon àn Lutt’nbarg en heur inwoners, zal goan stijg’n op de ranglieste van volgnd joar. Umdet wie met zien all’n onderdeel uut maakt van een meer dan geweldige gemeenschap.
Promovideo Luttenbergse Top 700
A face in the crowd was zo as e-zeg en beskreem de nummer 700 van de Top700 2022. In 2020 was ’t openingsnummer We built this city van Starship woarvan ie de speciale video hieronder kunt zíén.
Mà ja … wat zal 2024 breng’n ? Welk nummer hef dan de eer de Lutt’nbargae Top700 te openen ?
