Joa en dan binne wie àn’t eind van 2022 köm. En dan komt de gedachtn, de herinnering’, de memories as vanzelf noar boavn.
Memories as in ‘In Memoriam’ bèveurbeeld, want det is in Lutnbarg de laatste tied noadrukkeluk àn de orde (wes).
Memories, herinnering’ àn een somber joar? Joa zeeker, want ’t was en ’t is in disse roerige tiedn nie oltied makkeluk.
Gelukkig waan ok een hoop dinge wè weer meugeluk zo as ’t Stroatkoarenfestival, ’t Lutnbargs Feest en natuurluk die fan-tas-ti-sche Top700!
Earth and Fire is zelf ok nie àn’t leed ontsnapt. In november jl. stierf Chris Koerts, de gitarist. Eerder in februari 2019 was zien tweelingbreur Gerard (toetsenist) à störvn.
En de gezondheid van Jenny Kaagman löp flink achteruut. Sie lidt à dik 10 joar àn de Ziekte van Parkinson.
Mà ooh wat hebt ze mooie, vèrschrikkeluk goeie en herkenbare muziek achterloatn.
‘Memories’ is van 50 joar terugge, uut 1972, en wön toen in Nederlaand uut e-róépm töt ‘Beste Single’ van’t joar.
Kenmarkend in Memories is ’t geluud van de mellotron, een electronisch toetsninstrument. In Nederland was Earth and Fire één van de eerstn hiermet.
The Beatles (intro Strawberry Fields) en een paar aandere buutnlaandse artiestn hàn de mellotron à eerder ondekt.
Met Earth and Fire haale wie dus Memories op, in wat noe eind 2022 is.
Een joar woarin de Earth/Aarde manks in Fire/Vuur en vlam steun (Oekraïne).
Ok een joar woarin ’ter Earth/Aarde bestelde’ dorpsgenoten oons, zelfs recent nog, dóét mijmeren oaver wat was…
Tekstueel vin ik Memories gin stark nummer. De kracht zit h’m in de muziek zelf. En hoe!
’t Röp onherroepeluk een sfeer van melancholie op, van weemoed. Dit gevuul, det hoast vanzelfsprekkend richting Oaldjoarsdag een bettie de kop opstekt, wut deur Memories onmiskenbaar vèrstarkt.
Ik wēnse uulle oammoa een oprecht gelukkig en een gezond 2023 toe.
Klik hier voor de video