Àn ’t begin van’t toernooi bleek à det ’t Krukkertteam progressie maakt had t.o.v. veurig joar, toen ze overigens ok kampioen wun waan. De tied van dom knapm en h’m d’r op plofn hebt ze duudeluk achter zich loatn.
Met soeverein spel, gebaseerd op kennis en kunde wun de íéne noa de aandere teegnstaander vakkundig onder de biljarttoafel e-warkt.
’t Was een waar genot um noar te kiekn en in’t café koj bie toern een speld heurn valn, al kwaamp det ok wè umdet de Krukkerts deurgoans heel stille, sereen en geconcentreerd te warke gôat en absoluut nie van kabaal hoald.
Café De Schoenmaker had in ’t toernooi 3 teams in de strijd e-gooit, café Spoolder 4 en dan haj nog de outsider De Helderse Stoottroepm.
Bienoa oammoa sneuveln ze tötdet Spoolder1 en ’t Krukkertteam oaverbleem waan.
En wat die laatste 2 ploegn donderdagoamd 25 mei 2023 in de ultieme finale in de strijd gooin grēēnzn an’t onwoarschijnlukke. Vèrget Silence of the Lambs, vèrget de voetbal wk-finale Argentinië Frankriek, vèrget Michael Jackson met zien Thriller. ’t Is oammoa peanuts vèrglekn met wat de balkunstenaars van Spoolder en Krukkert op ’t met groen geweven laakn bekleedde leistíén lēūtn zien.
Helaas helaas bint d’r gin beeldn van mà ik denke wè det ’t tied wut veur de manager van ’t Krukkertteam um is een diepte-invèsteering te doen en een videocamera àn te schafn opdet in de toekomst de rest van de wereld ok met kan genietn van de artistieke hoogstandjes van dit Dreamteam.
Hoe dan ok, de finale was zinderend en is uuteindeluk met 4 puntn vèrschul e-wun deur Leo, Wim, Han en Theo.
Indien ie noe denkt, die heren wi’k wè is live zien optreedn dan kuj oe ’t beste meldn bie hun manager, dhr. P. Jansen (in Lutnbarg e.o. better bekend as Peter van de Asse). Wēēs d’r wè op tied bie want vol is vol al bint d’r mèschien oltied nog wè meuglukheedn veur de biljartbalvirtuoozn um is een demonstratie in de sporthal te geem.
Website Café- Zalen Spoolder