Zus van Knöldert nam haar leste advocaatie

"Wie ben ie dan?" "Ik ben Denne van Knöldert, zunne van Zus van Knöldert, die wear dochter is van Mans van Knöldert." "Oh, doar van."

Interessant? Deel het artikel

Denne van Knöldert

“Zeg Denne, de tillevisie dut het niet mear, zol ie ‘ns eam wullen kieken wat d’r is?
Hoef nie direct höar, mag ok mo’nn wel, mar ik wol eigenlijk venoamd best graag nog eam noar dokter Phill kieken.”

Det was mien moe an de tillefoon, Zus van Knöldert. Zie vund het mooi det haar zunne plat schreef en dan ok nog met de achtername die zie en haar vader Mans van Knöldert trots met zich mee namen. Tut in het graf. Want Zus zal mie niet meer bellen.

Tut vöar kort nog wel.
Dus dan stappen ik mar snel in de auto, deut het dekseltie van de batteriejen van de ofstandsbediening een kear open en dichte en dan deed de tillevisie het wear’
“Oh”, zei ze bienoa teleurgesteld, “aans mutte wie mar gewoon een neeje tillevisie kopen, zo’n groten.”

As bie oons thuus de vaste tillefoon ging, dan kon ie d’r donder op z’eng det Zus det was.

“Zeg Denne”, bellen ze dan, “ik heb ‘ns lopen denken, kan ik niet better een kleinere diepvries kopen? Det hoef nie direct höar, mar dissen stiet hillemoal löag en mak mie toch een hoop lawaai…”

“Ik komme wel eam kiek’n ma.”

En dan ging ik doar ok wel ‘ns an het werk. Met mien laptop op schoot.
“Heb ie doar dan oe hele kantoor inzitten? Toe, nem nog gerust wat cashewneuties.”

Een wekke later had ik ma wear an de lijn. “Disse neeje diepvries is wel wat klein, kan ik die oalen nog wear terugge krieng?”

Soms nam ik de vaste lijn gewoon nie op. Kwam mien vrouw d’r an: Denne, oe ma an de tillefoon. Of ie nog wat cash geld wult breng. Hef ze monn vrog om half neeng neudig, de tuinman kump. Mar het hoef nie direct höar!”

Dan zat ik al wear op de fietse noar een pinautomaat.

Ma regelen de zaken in huus tut haar leste dag. Zie wus haar lea’m lang altied precies wat d’r onder haar dak geböaren. Toen haar schoonzus uut het klooster bleef oavernachten was d’r een sloapkamer tekort, dus zat d’r niks aans op as det mien (toen nog) vriendiggie (noe mien vrouw) bie mie in bedde kreup, had ma bedacht.
Ik zeg: “Det doet wie stiekem altied al.”
Zus: “Dach ie det ik det nie wusse.”

Een paar wekken elene werd ik zelfs midden in de nacht ‘ebeld. Ik denk, het zal toch nie, det mut niet gekker wönn.
Was het de politie. “Nie schrikken” zeien ze. Nou, dan schrik ie oe, hoe zeg ie det in disse situatie, dan schrik ie oe een hoedje. Want ma was de leste tied wat in de warre.

Ma had hun ebeld, “zie wol de wichter niet wakker bellen”, zei de politie. “Dus dan doede wie det wel, heb ik moe beloafd. Zie hef lekkage, zeg ze. Een butenkrane stiet open en noe löpp de kelder vol.”

Ikke wear de auto in, mar alles wat ik thuus antröffe, gin blanke kelder.
Wel een kloarwakkere Zus van Knöldert.
Ik zeg: “mut ie niet noar bedde?”
Zus: “Nee. Ik heb kanker.”
Ikke: “Mar dan mut ie ea’m goed wel sloapen!”
Zie halen de scholders op en zei: “Kiek ‘ns in de wc dan, of het doar lekt?”
Ok nie. Mar zie was blie det d’r eam iene was weazen kieken.

Ik ben nog nie thuus of de tillefoon giet wear.
Zus wear. “Ik benne noe net boa’m, mar ik heb de voeten hillemoal nat, d’r is echt wat lek höar…”
Wat doe’j dan…
Stoa ik eam later bie haar thuus in de gang en verdomd, de verwarming lekken.
Zus was niks in de warre…

Vöarige wekke, half zesse in de vrogge m’onn… Ie roadt het al: de tillefoon.
Dit kear was het de verpleging: “Nie schrikken!”

Haa’n ze ma met de brandwearwaang boam uut haar huus ehaald en met de ambulance noar het ziekenhuus ebracht.

Toen ik haar doar an tröffe zei ze: ik heb zelf de braandwear mar ‘ebeld.
Later thuus hef ze d’r een advocaatje op edrunken. De lesten.

Word supporter van HierinSalland

HierinSalland is voor, maar ook van Salland. Word supporters en ondersteun ons. Door mee te doen of met een kleine bijdrage.

Interessant? Deel het artikel

Meer over

Blijf op de hoogte

Abonneer je op een of meerdere van onze nieuwsbrieven en ontvang elke week een update van de artikelen op Hier in Salland. Om de twee weken verloten we onder de abonnees om en om een pakket uit de biologische boerderijwinkel Overesch en de biologische Supermarkt in het Bos van Kleinlangevelsloo, beiden in Raalte. Bekijk de spelregels.

1 gedachte over “Zus van Knöldert nam haar leste advocaatie”

Laat een reactie achter

Het e-mailadres wordt niet gepubliceerd. Vereiste velden zijn gemarkeerd met *

Blijf op de hoogte

Abonneer je op onze nieuwsbrief en ontvang elke week een update van de artikelen op Hier in Salland. Iedere maand verloten we onder de abonnees een pakket uit de biologische boerderijwinkel Overesch in Raalte. Bekijk de spelregels.