Ha ha ha ha ha ha ha haaaa wat heb ik e-lach’n um det hele circus rondumme Joost Klein. En wat líédt wie in dit laand àn ongeleuflukke zelfoaverschatting.
Want det kjealtie in det rare blauwe pak zol ’t volgens de media wè ēēm goan maakn. Nou luu, hij maakn heemoa mà dan ok kats heemoa niks kloar tijdens det sowieso belachlukke circusact-festival. Hij was d’r duudeluk nie euh … geknipt veur.
(lees verder onder afbeelding)
Een song- of een líédtiesfestival met geweldige zangers en zangeress’n is det eurofiele gedoe à lange nie meer. Hoe gekker hoe better is teegnswoarigs ’t credo.
En joa, gooi d’r ok mà een fikse dosis politiek getinte saus oaverhèn inclusief vriendjespolitiek geurende aroma en woke-kruid’n want de uuteindelukke winnaar van disse Europese kokkepot wut ech nie kēūzn op basis van zien zangkwaliteit’n.
Zo is bèveurbeeld met ofstaand ’t beste líéd in decennia in 2014 of-e-serveerd umwulle van een kjeal met een Würst … of was ’t een wief met een board? Tjonge wat een blamage was det destieds veur het ‘song’festival. ’t Was een schoffering van 2 geweldige artiest’n, Waylon en Ilse DeLange, woarvan den Joost Klein nog nie íéns de veters mag strikk’n. Een schoffering ok van een pracht compositie zonder opsmuk, van een líéd zo puur en prachtig in ol zien eenvoud.
(lees verder onder afbeelding)
Mà goed, Joost moch noe dan metdóén, met de editie 2024, zo had íén of aandere commissie in íén of aandere bubbel beslötn. Woarbie ze hum tijdens de selectieprocedure vremd genog vèrkēūz’n hàn boav’n o.a. … Ilse DeLange. Ilse zal wè te gewoontjes e-wes hem denk ik dan.
Ik wasse à joaren kloar met die hypocriete oavergeacteerde nitwits in die showbizz-popp’nkaste. Wat mie betreft schaffe wie det hele festival of tenzij wie terug goat noar de basis. Wie weet, gebeurd det ooit nog is, as de rust noa de storm is weer-e-keerd
Pssst … ie kunt nog stemm’n hè, töt 1 juni: https://www.luttenbergtop700.nl/
